Newyddion:(cy)
News:(en)

Grahame Davies:(cy)
Grahame Davies:(en)

Adolygiadau:
Reviews:

Llyfryddiaeth:
Bibliography:

Llyfrau:
Books:

Cerddi:
Poems:

Lluniau:
Pictures:

Cysylltu:
Contact:

Cysylltiadau:
Links:

Grahame Davies

Enillydd Gwobr Llyfr y Flwyddyn Cyngor Celfyddydau Cymru 2002.

Enwebwyd ar gyfer Gwobr LLyfr y Flwyddyn 2005

"Un o leisiau mwyaf annibynnol, a chan hynny, mwyaf diddorol barddoniaeth Gymraeg gyfoes."
Gerwyn Wiliams

“Dychanwr heb ei ail,” John Gruffydd Jones.

"Fel nofel syniadol, mae Everything Must Change yn gamp ddeallusol fawr ac yn astudiaeth hynod o ddiddorol o gyflwr y genedl."
Alyce von Rothkirch.

"Dyma'r nofel ôl-genedlaetholaidd gyntaf," Dafydd Elis-Thomas am Rhaid i Bopeth Newid.

"Un o leisiau barddol cyhoeddus croywaf ei genhedlaeth," Emyr Lewis.

“Gall weld drwy dwyll a ffalster y bywyd dinesig, cyfryngol yn well na neb, ac mae’n ddeifiol yn ei weledigaeth o wacter y bywyd dinesig...mae gan y bardd hwn ddigon o feistrolaeth ar iaith i aflonyddu arnom, ac i gyrraedd at wraidd yr enaid.” Alan Llwyd.

“Ceir yma fyd-olwg newydd ar ein bywydau bob dydd ac mae’n orlwythog o ddelweddau ac ymadroddion cofiadwy.” Menna Elfyn.

“Mae ganddo ddawn dweud anhygoel. Nid oes un gerdd yn y gyfrol bron nad yw’n cynnwys brawddegau gwirioneddol dreiddgar a chlyfar.” Meirion MacIntyre Huws.


Bardd, golygydd a beirniad llenyddol. Cafodd ei eni yn 1964 a’i fagu ym mhentref glofaol Coedpoeth ger Wrecsam yng ngogledd ddwyrain Cymru.

Ar ôl cael gradd mewn Llenyddiaeth Saesneg yn CCAT (bellach Prifysgol Anglia Ruskin) yng Nghaergrawnt, fe hyfforddodd fel newyddiadurwr gyda chwmni Thomson yn Newcastle-upon-Tyne gan weithio wedyn ar bapurau newydd yn ne Cymru o 1985 tan 1991. Ers hynny mae wedi gweithio i BBC Cymru. Mae ei yrfa fel newyddiadurwr a chynhyrchydd wedi dod â nifer o wobrau Cymreig a Phrydeinig i’w ran.

Yn 1997, fe dderbyniodd ddoethuriaeth oddi wrth Prifysgol Cymru am ei astudiaeth o waith R.S.Thomas, Saunders Lewis, T.S. Eliot a Simone Weil. Roedd y gwaith, a ysgrifennwyd yn y Gymraeg, yn diffinio’r llenorion hyn fel rhan o fudiad gwrth-fodern yn niwylliant y Gorllewin yn yr ugeinfed ganrif.

Enillodd ei gyfrol gyntaf o farddoniaeth, Adennill Tir, (Barddas, 1997) Wobr Goffa Harri Webb. Prif ddeunydd y llyfr oedd y 10 mlynedd a dreuliodd yng Nghymoedd y de, ym Merthyr Tudful.

Yn 1998, ef oedd yn ail i Emyr Lewis am goron Prifwyl Bro Ogwr, gyda’r tri beirniad yn ei gael yn deilwng o’r goron am ei ddilyniant “Rhyddid.”

Yn 1999, cyhoeddwyd ei astudiaeth o Gymru a’r mudiad gwrth-fodern, Sefyll yn y Bwlch, (Gwasg Prifysgol Cymru), sef cynnyrch ei ddoethuriaeth. Disgrifiwyd y llyfr gan y beirniad Dr Dafydd Glyn Jones (Barn), fel: "astudiaeth a enilla’i le yn syth yn rheng flaenaf beirniadaeth ein dydd. ” “A signal book” oedd disgrifiad y beirniad Dr Angharad Price ohono (New Welsh Review).

Yn 2000, fe gydolygodd Oxygen, (Seren) blodeugerdd ddwyieithog o feirdd o Gymru o dan oed 45.

Yn 2001, ymddangosodd ei ail gyfrol o farddoniaeth, Cadwyni Rhyddid, (Barddas). Aeth i ail argraffiad o fewn ychydig fisoedd ac fe enillodd Wobr Llyfr y Flwyddyn Cyngor Celfyddydau Cymru yng Ngwyl y Gelli, 2002, ynghyd â £3,000 o arian.

Yn 2002, fe gyhoeddodd Seren ei flodeugerdd lenyddol, The Chosen People, sy’n trafod perthynas y Cymru a’r Iddewon, fel mae’n ymddangos mewn llenyddiaeth.

Yn 2002 hefyd, fe olygodd rhifyn 160-tudalen o’r cylchgrawn llenyddol Bwlgaraidd Plamak ("Fflam") wedi ei neilltuo i lenyddiaeth Cymru, y tro cyntaf i gasgliad Cymreig ymddangos yng ngwledydd y Balcan.

Yn 2002 fe ymddangosodd Ffiniau/Borders, (Gomer) cyfrol ddwyieithog o farddoniaeth ar y cyd gydag Elin ap Hywel.

Yn 2004 ymddangosodd ei nofel gyntaf, Rhaid i Bopeth Newid (Gomer). Cafodd ei chynnwys ar y Rhestr Hir o 10 ar gyfer gwobr £10,000 Llyfr y Flwyddyn, 2005.

Yn 2004, ymddangosodd ei gasgliad o farddoniaeth Gymraeg mewn cyfieithiad Astwreg o wasg Kêr ar Mor dan y teitl Nel país del borrina (Gwlad y Cymylau).

Yn 2005, ymddangosodd ei ddetholiad o farddoniaeth Gymraeg mewn cyfieithiad Galiseg dan y teitl No país de la brétema o wasg VTP Editorial.

Yn yr un flwyddyn, cyhoeddodd Seren The Big Book of Cardiff, blodeugerdd o ysgrifennu cyfoes am Gaerdydd, wedi ei gyd-olygu gan Peter Finch a Grahame Davies.

Yn 2005 hefyd, fe ymddangosodd ei drydedd gyfrol o farddoniaeth Gymraeg dan y teitl Achos (Barddas).

Yn 2006, ymddangosodd ei gasgliad o waith gan ffoaduriaid a cheiswyr lloches yng Nghymru, Gwyl y Blaidd / Festival of the Wolf, o wasg Parthian/Hafan, wedi ei olygu ar y cyd gyda Tom Cheesman a Sylvie Hoffman.

Yn 2007, cyhoeddodd Seren yn cyhoeddi Everything Must Change, nofel Saesneg wedi'i seilio ar Rhaid i Bopeth Newid.

Hefyd yn 2007, bydd Seren yn cyhoeddi Real Wrexham cyfrol o seico-ddaearyddiaeth yn y gyfres Real a olygir gan Peter Finch.

Mae’n aelod llawn o’r Academi Gymreig ac ef oedd Golygydd Cymraeg y cylchgrawn Poetry Wales am nifer o flynyddoedd tan 2002. Enillodd wobr y vers libre yn Eisteddfod Genedlaethol 1994, a Stomp yr Academi yn Ninbych yn 2001. Mae ei waith wedi ei gyfieithu i nifer o ieithoedd gan gynnwys Saesneg, Almaeneg, Pwyleg, Latfieg, Maltaeg, Bwlgareg, Astwreg a Galiseg. Mae ei gerddi wedi eu cynnwys mewn sawl blodeugerdd gan gynnwys Cerddi’r Troad, Hoff Gerddi Cymru, Poeth, Cerddi Caerdydd, Cerddi Clwyd, a Both Sides of the Border ac mae wedi ymddangos mewn nifer o gyhoeddiadau megis y Times, Times Literary Supplement, Poetry London, y Literary Review yn America, Orbis (#136 Gwanwyn 2006) a’r Yearbook of Welsh Writing in English. Mae’n cyfrannu erthyglau ac adolygiadau yn rheolaidd i gyfnodolion megis Barddas, Poetry Wales, Barn, Taliesin, Planet a New Welsh Review, ac mae ei farddoniaeth ar faes llafur ysgolion Cymru. Mae'n golofnydd rheolaidd gyda Barddas. Mae'n darllen yn rheolaidd mewn gwyliau celfyddydol, gan gynnwys yr Eisteddfod Genedlaethol, Eisteddfod Gydwladol Llangollen, Gwyl Greenbelt, Poesiefestival Berlin, nifer o achlysuron yng Ngwyl y Gelli ac yn y Royal Festival Hall yn Llundain. Mae wedi cynrychioli Cymru mewn gweithgareddau llenyddol yn Ewrop ac America, ac mae wedi ymddangos yn aml ar radio a theledu. Mae'n ddarlithydd cysylltiol yn Adran y Gymraeg, Prifysgol Caerdydd (Ysgrifennu Creadigol), ac ers 2004, mae'n Gymrawd Coleg Goodenough, Llundain. Fel beirniad llenyddol, fe gadeiriodd banel y beirniaid ar gyfer gwobr Llyfr y Flwyddyn 2004, ac mae wedi beirniadu cystadlaethau mawrion eraill megis y John Tripp Award for Spoken Poetry a Medal Ryddiaith yr Eisteddfod Genedlaethol yn 2006. Mae wedi cwblhau nifer o gomisiynau barddoniaeth ar gyfer comisiynwyr megis Ei Uchelder Brenhinol Tywysog Cymru, i S4C ac ar gyfer Canolfan Mileniwm Cymru, ac mae'r cyfansoddwr Karl Jenkins wedi gosod peth o'i waith i gerddoriaeth ar yr albwm Requiem. Mae'n aelod o'r Society of Authors ac yn aelod o fwrdd yr Academi Gymreig.

Noder: Mae holl deithio Grahame Davies, a'i ddefnydd o ynni domestig a swyddfa, yn cael ei garbon-gydbwyso drwy'r elusen gadwraeth World Land Trust.